"කොල්ලො මේ
කිරි එක බීල පලයන්!"
"බෑ අම්මෙ,
පරක්කුයි
පරක්කුයි!"
"ඔව් ඉතින්
පස්සට ඉර වැටෙනකන් නිදාගෙන ඉඳල, අන්තිමට
පරක්කුයි පරක්කුයි කියල දුවපන්, කවද හැදෙයිද
මන්ද මේ ළමයි"
"හරි හරි අම්මෙ,
මම යනව"
"හා හා,
රෑ වෙන්නෙ නෑනෙ
එන්න"
"කියන්න
බෑ"
කළු දුම්
වළාවකින් වට වුන රතු පාට බස් එක ඈතින් එනව දුටු රංග හනි හනිකට බස් එකට දිව්ව නමුත්
බස් එක මඟ හැරිණ.
"චික්! අදත් මිස් වුනා, දැන් මොකද
කරන්නෙ" සිතමින් ඔහු තම අත බැඳි ඔරලෝසුව වෙත තම නෙත් යොමු කලේ වෙලාව බැලීමටම
නොව, කලබල වූ විට
ඔහු කරනා එක් පුරුද්දක් ලෙසය.
"ඒයි රංගය!
නැගපන්" මෝටර් සයිකලය නැවතූ දිනුක ගේ ඇරයුම රංගට මහත් අස්වැසිල්ලක් විය.
"අම්මෝ උඹ නම්
දෙයියෙක් නෙමේ දේවාලයක්, මාව ස්ටේෂන්
එකට දාපන්කො"
"කීයටද කෝච්චිය?"
"හයයි
හතලිහ"
"දැන් හයහමාරයි,
බය වෙන්න එපා මම උඹව
වෙලාවට දාන්නම්"
"උඹ කොහෙ යන
ගමන්ද?"
"මම මේ ට්වුන්
එකට යනව පොඩි වැඩකට"
"එල"
දිනුකගේ මෝටර්
සයිකලය අහස් යානයක් මෙන් වාතය කපාගෙන ඉදිරියට ඇදුන අතර එය රේල් ගේට්ටුව අසල නතර
කරන විටත් රංග යා යුතුව තිබූ දුම්‍රිය පැමිණ තිබිණ. වහා මෝටර් සයිකලයෙන් බැස ගත්
ඔහු දුම්‍රියේ එල්ලුනේ එය පිටත් වීමට ඔන්න මෙන්න අවස්ථාවේදීය.
පෞද්ගලික
සමාගමක සහකාර ඉංජිනේරුවෙක් ලෙස රැකියාව කළ රංග එම රැකියාවට ගොස් එපමණ කලක් නොවීය.
කෙසඟ සිරුරත්, නිතරම
අපිළිවෙලක් පෙන්වූ කොණ්ඩයත් ඔහු වෙතින් පෑවේ දඟකාර තරුණයෙකුගේ විලාශයකි. රැකියාවට
අලසයෙක් නොවූ ඔහු නිතැතින්ම නිවසේ අලස පුතණුවන් බවට පත්වූයේ නිවසේ වැඩ කටයුතු සඳහා
ඔහුගෙන් ලද මන්ද දායකත්වය නිසාවෙනි.
"දෙවෙනි
වේදිකාවට පැමිණියේ පානදුර දක්වා ධාවනය වන මන්දගාමී දුම්‍රියයි, එය පානදුර දක්වා සෑම
දුම්‍රිය ස්ථානයකම නවත්වනවා ඇත"
රාගම දුම්‍රිය
ස්ථානයේදී එලෙස යකඩ කටෙන් හඬ පිට කරන විට රංග තමා නැංග දුම්‍රිය මැදිරියේ සිට සැමදාම
ඔහු ගමන් කරන සුපුරුදු දුම්‍රිය මැදිරියට මාරු විය.
"අඩෝ උඹ අදත්
පරක්කු වුනාද?"
"ඔව් බන්"
"උඹ
ඉඳගන්නවද?"
"එපා බන්
දාඩියයි, මම දොරට යනව.
ඒයි ශෂිකය මට පොඩ්ඩක් ඉඩ දීපන්!"
දුම්‍රිය හොරපෙ
දුම්‍රිය ස්ථානයේ නවතා නැවතත් ගමන් ඇරඹීමට ඔන්න මෙන්න අවස්ථාවේ, දම් පාට ටී ෂර්ට් එකක්
සහ ඩෙනිමක් ඇඳ ගත් යුවතියක් ඈත සිට දිව ආවේය. ඇයගේ අභිප්‍රාය දුම්‍රියට ගොඩ වීම
නමුත් දුම්‍රිය ගමන් ඇරඹීය. රංග තම අතක් ඇය වෙත යොමු කලේ ඔහුටත් නොදැනිම මනුස්ස
කමට විය යුතුය. ඇය ඔහුගේ සවිමත් හස්ථයේ වාරුවෙන් ඒ වනවිටත් ගමන් ඇරඹී තිබූ දුම්‍රියට
වීර කාන්තාවක් සේ ගොඩ වූවාය.
ඇය තවත් තත්පර
කීපයක් රංගගේ හස්ථය බදාගෙන සිටියාය, ඇයගේ හදවත දඩ
දඩ ගා වේගයෙන් ගැහුනේ දුම්‍රිය නගන හඬටත් වඩා හඬක් ඇගේ සවනට දනවමිනි, නමුත් ඒ හඬ ඇසුනේ ඇයට
පමණි. අධික වේගයෙන් දිවීම හේතුකොටගෙන ඇයගේ හෘද ස්ඵන්දනය වැඩි වී තිබිණ.
2 comments:
මොකක්ද ඒකේ තේරුම?
මේක කොටස් වශයෙන් යන කතාවක්! තේරුම හිතා ගන්න කාලයක් යයි! :)
Post a Comment